Source : FRAD044 B 1237 [i]
Registre papier, 339 feuillets
Du vingt et deuxiesme jour de juin mil six cens quarante et un
. . .
[folio 36, recto]
Loguellou
Nous dits Commissaires voyans par la Reformation de l'an mil cincq cens trante neuff [1540 n.st.] qu'il avoit esté donné quantité de terres à rente à plusieurs particuliers qui s'étoient trouvés dès lors uzurpés dans l'enclave desdicts fauxbourgs, unne partye desdicts fauxbourgcs consistants en terre champestres en un enclave appellé Loguellou, composés de plusieurs tenues, et que ayant condessandus sur lesdictes terres par trois diverses fois après avoir sommé les particuliers pocesseurs d'icelles de nous les indicquer et nous en monstrer les desbornnemmens pour les pouvoir enroller sur le rolle que nous dresserions desdictes domainnes, et mesmes après les avoir advertyes en nos audiances [ ... blanc ... ] juin mil six cens quarante et un et aultre ordonnance le troiziesme juillet audit an, le leurs aurions faict scavoir à ban et cry public, et leurs aurions d'abondant donné terme et assignation comparoir devant nous en la Ville de Rospreden pour nous en faire desclarations spécifficques le vingt et quatriesme jour de juillet mil six cens quarante un.
CE QUE N'AYANTS faicts et ne pouvant trouver lesdictes terres suivant la description de ladicte Refformation, aurions avecq lesdicts séneschal et procureur du Roy avisé de faire descriptions en général dudict enclave de Loguellou que nous aurions prises? depuis la Ryve de la Mer, joignante le Chemin qui conduict de Concq à Quimper Corantin et un Moulin à Vant [vent], et le continuer par devant le lieu de [folio 36, verso] Querancalvès et le fossé [talus ?] séparant le Parc Lhermite du Parc Ernothon par unne vannelle qui sépare le courtil du sieur de Kergournadeach dudit Parc Ernothon et passer à unne vannelle quy conduit de Concq en passant par devant le Four du Lain icelluy en comprins / à la Croix de Keranbriguand ; et de la Croix dudit Keranbriguand à la Ryve de la Mer appellé Trézanguern [Trez an Guern ?] à présent le Sable Blangc ; et ce que la mer encerne despuis ledit Trézanguern jusques audit Chemin de Concq à Quimper Corantin et au Moulin à Vant ; et auryons taxé les pocesseurs desdites terres suivant l'estimation donnée pour chacun journal de terre par ladite Refformation à payer pour chacun desdicts journaux de terre chaude la somme de sept sols six deniers monnoie, et de chaque journal de terre froide trois sols neuf deniers monnoie et les auryons condempnés sollidairement [à] payer lesdites renttes à ladicte proportion que devant, n'ayants peu descouvrir à quy elles sont en particulier jusques à çe que les particulliers n'ayant faict faire unne discution de leur portions èsdictes terres par Me Morice MILLON, Jan LE BRETHON, priseurs jurés èsdictes jurisdictions nous auroint faicts raport y avoir le nombre de cincquante neuff journeaux de terre que nous avons trouvé monter à la somme de vingt et six Livres unze sols thournois chacun an.
Et avons aprins lesdictes terres pocédées par
- Escuyer Guillaume CAILLEBOTE, sieur de Kerléano,
- Escuyer Louis FROLLO sieur de Kerlivio Kerlivio (sic),
- Me Pierre du VAL,
- Me Jan GUILLIMIN, greffier de Concq,
- Messire (sic) Jan SAUVAGET sieur Desclos [des Clos ?],
- Mes François, Guillaume, Yvon CARADEC,
- Damoiselle Anne de La Chappelle,
- Honorable homme Raoul TANYOU,
- Mes Michel, Jan et Xpõfle PHELIPE,
- Me Regnault [GOURDIN (rayé)] GOUREIN,
- Janne DROUALLEN, veufve [de] feu Nicoles LE GUIFFANT,
- Lucas LE DONFF,
- Nobles gents [folio 37, recto] Guillaume LE CAIN, sieur de Keranguelfen,
- Me Martin LE PAIGE, tutteur et garde des enffans mineurs [de] feu Claude LUHANDRE,
- Me Guenollay CHAUVINCOURT,
- Me Allain Le ROUXEAU, sieur du Forestic,
- Jan OGER, sieur de la Rue Blanche,
- Me Jan NEDELLEC
- Et nombre d'aultres ainsin qu'il est porté par Nostre santance du vingt et sixiesme de juillet mil six cens quarante et deux estant en nostre greffve
De laquelle solliditté ? cy devant, nous les avons deschargé, passé de la discution qu'ils auront faict faire, laquelle nous leurs ordonnons faire nottifier au Procureur du Roy en rendre copie entre les mains du recepveur de sa Magesté pour en faire la recepte.
|
